هند : شروق انا مخنوقة أوووي ومش قادرة أذاكر وبقرأ قرآن وبقول الأذكار

هند : شروق انا مخنوقة أوووي ومش قادرة أذاكر

وبقرأ قرآن وبقول الأذكار

لكن حسيت بالملل

تعبت من الثانوية العامة

شوفي من إمتي بنذاكر حتي ملحقناش ناخد أجازة والدروس نزلت علينا بسرعة

تعبت ياشروق ومليت وفي نفس الوقت مفيش وقت للزهق

هلاقي كل حاجة إتراكمت عليه لو سبت المذاكرة

مش عارفة انا ليه بقيت مخنوقة من كل حاجة

شروق : الله المستعان

طيب حاولتي تغيري طريقة المذاكرة يا هند

أو حتي تخرجي عند قرايبك تنفسي عن نفسك

هند : أيوة عملت بجد

شروق : طيب تحبي أذاكر معاكِ نشجع بعض لحد ما تخرجي من الزهق

هند : ياريت يا شروق

عايزة حد يفتح نفسي علي المذاكرة

شروق : وانا بجد هكون سعيدة أوووي وانا بذاكر معاكِ

هند : ربنا يباركلي فيكِ يا شروق

شروق : ويباركلي فيكِ يا غالية

بس قبل ما أجي أذاكر معاكِ

ممكن تسمعي شريط كيف تعلو همتك للشيخ هاني حلمي

نزليه من علي النت عندك

علشان مش أجي ألاقي النوم علطول أول ما نقعد ها ^^

هند: وتضحك هند ربنا يكرمك ياشروق

حاضر يا غالية

هسمعه متخافيش ما انا لو نمت هتكبي عليه مية وتصحيني ^^

إزاي يعني انام وإنتي عندي

ده يبقي ضعت خالص

شروق : وتضحك شروق يا بنتي بهذر معاكِ بس إسمعيه بجد

هند : متخافيش يا بنتي بإذن الله هسمعه

وفعلا عادت هند للبيت

وجلست علي الكمبيوتر لتسمع الشريط

فإذا به يقول

علي أعتبار ان كل واحد منا بيأتي عليه فترات علو ودنو في الهمه

والرسول عليه الصلاه والسلام قال (إن لكل عبداً شره وفتره )

شره يعني نشاط

بمعني ان كل انسان ليه فترات بيشتغل كويس والهمه عنده عاليه وفترات تانيه عنده احساس بالفتور ومش عاوز يعمل حاجه

طيب ازاي انت تتعامل مع فترات الفتور دي دا اللي عاوزين نعرفه في الأول كدا اسأل نفسك سؤال مهم اوي وهو

عاوز همتك تعلوليه ؟ ايه هو هدفك ؟

الهدف اللي احنا جاين عشانه النهارده هو حالك مع ربنا وعلاقتك بالله كانت كويسه وبتقوم بأورادك بشكل جيد والحاله الإيمانيه عاليه

وتيجي مره واحده كل دا يروح بخبطه واحده وبعد كدا عاوز تعرف ازاي

تقوم تاني وتقرب لربنا زي الأول

**اول خطوه في العلاج هي النيه والأخلاص**

طيب ليه لأن الطريق لعلو الهمه لازم فيه تكون محدد هدف واضح قدام عنيك ومركز عليه

والكلام دا علماء النفس بيقولوه بالحرف بيقولوا ان حصر الذهن في مطلوب واحد هو دا مفتاح النجاح بشكل عام في الحياه

وهي دي قضيه الأخلاص انت حاطط هدف ومركز عليه وفي الحاله دي تكون النتائج فوق الوصف بإذن الله

طيب وهدفنا هو ايه ؟ هدفنا هو الجنه عاوز توصلها قدام عنيك شيفها بتحدث نفسك بيها

ولذلك لا ترضي بالدون والأقل وكل لما تركز اكتر عليها كل لماتبلغ اعلي درجات الجنان
بعض العلماء بيقولوا إن القدره تكتسب بالميران والتدريب

هنقول مثال علي كده واحد لسه في بدايه الألتزام يبص حواليه يلاقي كل اللي معاه سابقينه في الألتزام

وهو لسه يدوبك بيبدأ يمسك مصحف يتعلم أحكام التجويد ويقول لنفسه خلاص القطر فاتني وانا مش هنفع ويمشي بخطوات تقيله وممكن كمان ينتكس

إنما لما يحدد لنفسه هدف زي مثلا هيحفظ جزء الشهر دا ويبدأ في تحقيق الهدف ويحسس نفسه بالنجاح

ويقول انه بينجح وكويس بفضل الله يلاقي في سنه واحده او اتنين حقق اللي الملتزم من سنين طويله ماحققهوش

لأنه هدفه كان واضح ومحدد ومركز عليه

وهي دي بقي روشته الأخلاص وتوحيد القصد اي مقصودك ايه من علو الهمه ومقصودك هو رضا الله سبحانه وتعالي

**تاني خطوه في العلاج هي الشكـــــــر**

اللي بيحرمك من نعمه القرب من ربنا انك ماشكرتش النعمه دي والشكر هو مفتاح التحرك وعلو الهمه

ربنا اعطاك نعمه كبيره وهي انه أذن ليك انك تقرب منه خطوه

والرسول صلي اتلله عليه وسلم قال ( قال الله : تقرب إلي شبرا تقربت منه
ذراعا ، ومن تقرب إلي ذراعا تقربت منه باعا ، ومن أتاني يمشي أتيته هرولة )

ربنا اعطاك النعمه د وكمان لما هتقرب منه بيكفأك علي قربك وعيل الخطوه بالضعف وانت ما حستش ان دي نعمه ربنا ادهالك

زي مثلا الناس اللي لسه في بدايه الألتزام بيبقوا اقوي الناس واعلي الناس
همه لأنهم حاسين بالنعمه اوي بيقارنوا بين حالهم دلوقت وحالهم زمان ويوقولا
احنا كنا فين وبقينا فين ويشكروا الله علي كدا ويحسوا بمعاني ايمانيه
وخشوع بفضل توبتهم

وانابتهم والرجوع لله سبحانه وتعالي وبعد كدا خلا الموضوع يبقي عادي ومش حاسس بالمعاني دي لنها سلبت منه

لذلك انت لما تحس انك بترجع لورا او بتقف ابحث عن حاجتين اولهم الشكر
لنعمه ربنا سبحانه وتعالي اللي انت ماشكرتهاش علي الوجه المطلوب منك

وتاني حاجه طريقه نظرك للعمل اللي انت قومت بيه يعني مثلا بكيت في صلاه
القيام وربنا فتح عليك ااو مثلا التزمت بصلاه القيام فتره طويله تقعد بقي
كل شويه تحدث نفسك بالعمل دا ويكون ليه وزن عندك وتقول دا انما عملت كذا
وكذا وتنسب العمل ليك انت اهو دا يضيع منك العمل

لأنك بتنسبه لنفسك لازم تعرف ان اي عمل انت بتعمله هو محض فضل من الله سبحانه وتعالي ولا بحولك ولا بقوتك

هو فيه حد منا يستاهل انه يقف بين ايد ربنا ويناجيه ويتلفظ بأسمه فلما الواحد يعرف ويحس بكدا هيحس بنعمه ربنا عليه

**تالت خطوه في العلاج هي اياك ونقض العهد مع الله **

نيجي بقي لسلسه المنشطات الإيمانيه اللي انت بتشحن نفسك بيها واولها اوعي
تنقض عهدك مع ربنا تحت اي ظرف من الظروف لأن اسا الطرق الي الله هو
الصدق انت بالصدق تبلغ وتعلي همتك

خطيره نفسياً وإيمانياً انك تاخد علي نفسك عهود وتنقضها

لأنك لما تكون مقرر وقت محدد للطاعات وتقول هعمل كذا وكذا وجيت تعمل اللي
انت مقرره ولاقيت معوقات ومثبطات وأجلت العهد مره والتانيه والتالته هتحسس
نفسك تاني بالفشل وبصعوبه الموضوع وهتسوف

يبقي انت لازم يكون عندك سرعه رد فعل مطلوبه جدا منك

ربنا سبحانه وتعالي قال (وَنُقَلِّبُ أَفْئِدَتَهُمْ وَأَبْصَارَهُمْ
كَمَا لَمْ يُؤْمِنُوا بِهِ أَوَّلَ مَرَّةٍ وَنَذَرُهُمْ فِي
طُغْيَانِهِمْ يَعْمَهُونَ ﴿١١٠﴾الأنعام )

اول لما اتقا الكلام تلقيت الرساله ازاي وقولت هعمل وهغير حياتي

اوعي من كلمه ســـــــوف ومقدرش ومنفعش وصعب

انت مش محتاج تضخم هدفك ابتدي بحاجه تقدر عليها ما تفكرش في اللي فات

والعلماء بيقولوا لا تشغل نفسك بأمس فقد فات ولا تشغل نفسك بغد فهو غيب إنما كن ابن اللحظه

عاهد ربنا ولا تنقض العهد بينك وبينه الرجال اصحاب الهمم العاليه ربنا قال عليهم

(مِّنَ الْمُؤْمِنِينَ رِجَالٌ صَدَقُوا مَا عَاهَدُوا اللَّـهَ عَلَيْهِ )

عاهد ربنا علي الشئ اللي تقدر عليه يعني تقول الأسبوع ده هصلح الأذكار الأسبوع اللي بعده صلاه القيام وهكذا

**رابع خطوه شده الحـــــرص علي الوقت **

لازم تكون حريص اوي علي وقتك الرسول صلي الله عليه وسلم قال

(ليس يتحسر أهل الجنة إلا على ساعة مرت بهم لم يذكروا الله تعالى فيها)
وقال كمان (نعمتان مغبون فيهما كثير من الناس : الصحة والفراغ )

لازم تكون الدقيقه عندك تختلف وتفرق معاك دا انت في الدقيقه دي ممكن تقول
سبحان الله وبحمده سبحاان الله العظيم خدت منك ايه وبسببها تغرس لك نخله في
الجنه وممكن تقول بس استغفر الله يمحي لك ذنب في ثانيه ويكون الذنب دا كان
قاطع بينك وبين ربنا سبحانه وتعالي

لازم تعرف انك مش
زي اي حد لأنك مسلم والوقت عندك مهم وعشان كدا اهل الجنه هيتحسروا علي
الساعه اللي مذكروش فيها اسم الله سبحانه وتعالي

إذا لا
تهدر الوقت ابداً ومن الكلام الجميل اوي ( قيد الطاعات بأعيان الأوقات
)يعني شوف في كل لحظه انت وراك ايه لازم في كل لحظه يكون ليك فيها طاعه
لربنا وتشوف حال قلبك ايه مع الله عرفته اكتر واتقربت ليه ولا لأ ؟؟؟

**خامس خطوه هي رفقه أصحاب الهمم العاليه **

خليك دايما حريص انك تكون مع الناس اللي يعلوك ويقربوك عند ربنا والرسول
عليه الصلاه والسلام قال (المرأ علي دين خليله فلينظر أحدكم من يخالل)

والصاحب زي ما بيقولوا ســـــــــاحب

والرسول صلي الله عليه وسلم قال (مثل الجليس الصالح والسوء ، كحامل المسك
ونافخ الكير ، فحامل المسك : إما أن يحذيك ، وإما أن تبتاع منه ، وإما أن
تجد منه ريحا طيبة ، ونافخ الكير : إما أن يحرق ثيابك ، وإما أن تجد ريحا
خبيثة )

دائما وابدارافق اصحاب الهمم العاليه ومنى هم اعلي منك وحاول تقلدهم وتعمل زيهمبل تسبقهم كمان

الواجب العملي للدرس دا النهارده هو انك اول حاجه تحس باصطفاء الله ليك
شوف كام واحد ربنا انعم عليهم بالنعمه ديه كام واحد بيفكر يقرب من ربنا
وبيفكر فيه حس بأنها نعمه كبيره اوي

ربنا قال سبحانه وتعالي (وَلَا تَهِنُوا وَلَا تَحْزَنُوا وَأَنتُمُ الْأَعْلَوْنَ إِن كُنتُم مُّؤْمِنِينَ ﴿١٣٩﴾آل عمران )

انت بإيمانك وقربك من ربنا انت الأعلي كلمه كبيره ومهمه اوي لو حستها بجد

رددها بينك وبين نفسك كتير واعرف ان هي دي السعاده الحقيقيه والله

تاني حاجه فكر نفسك دايما بالموت وان الدنيا مش مستاهله انك تهتم بيها ابدا
وفكر بينك وبين نفسك ايه اللي موقفك لو كانت ذنوب تقدر تمحيها لو مش قادر استقوي باللي خلقك لاحول ولا قوه إلا بالله

استنزل رحماته عليك بالدعاء والذكر قوله يارب خذ بيدي وناصيتي إليك أخذ الكرام عليك

قوله يارب عيني مافكرش إلا فيك لاتستودع قلبي شئ إلا محبتك

يــــــــــــــــارب
يــــــــــارب
يـــارب
ليه تــــــــــــــحرم نفســـــــــــــك منــــــــــــــــه

هند:

الله يا شروق إيه الدرس التحفة ده

ربنا يكرمك

ده إنتي هتيجي تلاقيني جاهزة أووي بإذن الله

وفعلا

ذاكرت شروق مع هند حتي تغلبت علي الزهق

واتفقوا ان يشجعوا بعض علي طاعة الله من خلال رسائل الموبيل

بالتذكير بالطاعات في أوقاتها

وأصبحت شروق وهند وروان أصحاب وأصبحوا يتكلمون عن الدين كثيرا

وكانت السعادة تملئ قلبهم

وظلت هند وشروق تشجع روان لتعويض مجموعها

واجتهدت روان كثيرا في المذاكرة لتعوض مجموعها

واقتربت إمتحانات الصف الثالث الثانوي والكل مرعوب

من القصص والروايات التي علي لسان الطلبة في هذه الفترة

ولكن يختلف روان وشروق وهند في هذه الفترة

ياتري ماذا فعلوا

وفي تلك الفترة كانت هناك مفاجأة في بيت شروق

ياتري ما هي ؟؟

ده ال هنعرفه الحلقة القادمة بإذن الله