تركنا متاعنا لوجه الله

موضوع: تركنا متاعنا لوجه الله 2011-06-12, 1:15 am

السلام عليكم ورحمه الله وبركاته :

انا فتاه متزوجه واعيش مع زوجي فى بلد اجنبي , وهناك طبعا الحياه جميله جدا
ونضيفه فوق الوصف وفيها مغريات صعب ان الواحد يضحي بيها , مرت بينا
السنوات وكان همنا الشاغل فى هذه الغربه اننا نتمسك بديننا مهما كانت
الظروف وده صعب جدا انك تتمسك فى دينك فى وسط بلد لا يعرف احد فيه الله!!!
بس الحمد لله نجحنا وقدرنا اننا نحافظ على عبادتنا وكل مره للأحسن ولله
الحمد , بس من فتره ليست ببعيده حصلت لنا مشاكل هناك صعبه اوى وبدأنا نلاقي
أن احنا أكلنا وشربنا بقى من فلوس حرام!! واحنا مش واخدين بالنا من كده
فقلت لزوجي لازم نوقف المهزله دى ونرجع بلدنا وهو كان رافض علشان احنا
عايشين احسن عيشه وبناكل احسن اكل والكلام ده كله , وان احنا فى مصر لا
نمتلك من حطام الدنيا كما يقولون غير شقه. بس انا مكنش ينفع اتخلى عن وعدى
لربي انى اتقي الله واحافظ على ديني ونفسي وفى يوم من الايام وقفت وقفه مع
زوجى وقفه كبيره جدا وقلتله يا انا واولادك يا الغربه , وطبعا الحمد لله
اختارنا احنا ونزلنا مصر ونحن لا نملك اى شئ غير الشقه , وبيعناها علشان
نفتح مشروع نعيش بيه واجرنا شقه صغيره جدا ومتواضعه وكانت نتيجه كده ان اهل
زوجي واهلى قاطعونا وخصوصا اهلى لانى من أسره شديده الثراء وكان صعب عليهم
يشوفوا بنتهم فى الوضع ده لكني لم أبالى انا ضحيت بكل متاع الدنيا علشان
خاطر ربي حبيبي مولاي , ضحيت بالمال الوفير والثراء والعربيات والدهب وكل
المتاع ده علشان خاطر حبيبي ( الله ) انا عاهدته انى عمري ما حعمل حاجه
تغضبه وكنت لازم اوفى بوعدى ده مهما كان الثمن لو كنت حنام فى الشارع حتى .
وفى مره زوجي قالى انا خايف اوى من اللى احنا عملناه ده خايف نندم عليه
فرديت عليه وقلتله يازوجي الحبيب هو فيه حد يحفظ الله ويقوم ربنا يضيعه
؟!!! ثق أنك فى حمى ملك الملوك وانه لن يضيعك

والله يا اخوانى واخواتى انا عايشه حياه سعيييييييييييييده جدا جدا فوق ما
تتصوروا المشروع ربنا بارك فيه جدا وبيجيب لينا ربح كبير ولله الحمد وربنا
أنعم عليا بالنقاب كمان الحمد لله وكل الكرم ده ليه علشان حافظت على عهدي
مع ربي وانا واثقه انه لن يضيعني ابدا ..وفى الاخر حقولكم جمله سمعتها من
شيخ جليل وهى ( إن كنت تريد أن يحبك الله فأزهد فى الدنيا )

اسفه لو كنت طولت عليكم والسلام عليكم ورحمه الله وبركاته