غسيل الاطباق ومسح الارض مش عيييييييب

السلام عليكم ورحمة الله وبركاته

بداية ياجماعة انا مكنتش هاكتب اى حاجة عن نفسي خالص او اى عمل بعمله
بس لما شوفت ان بعض الرجال وللاسف فيه منهم ملتزمين بيقع فى عقوق الوالدين
اضطريت انى اكتب

انا عضو هنا فى المنتدى ربنا أكرمني ومن عليا بالاستقامة (أظننى كذلك) من عدة سنوات

وقبل رجوعي لربنا كنت وحش جدا وبعمل كل حاجة وحشة ربنا يغفر لنا ويتوب علينا ويسترنا

وكان من ضمن الذنوب اللي بقع فيها هى عقوق والدتي ربنا يغفر لي

لما ربنا اكرمني ورجعت لطريقه بدأت اعرف حق أمي عليا بدأت اتكلم بأدب واحترام مع والدتي وهي

لاحظت كده وكانت بتدعيلى دايما

مع مرور الوقت نظرا لاني ماليش اخوات بنات بدأت اشوف ماما تعبانة من شغل البيت هى لوحدها

بقت تصعب عليا وبقيت اساعدها فى كل حاجة

أغسل لها الاطباق وافرش السراير وامسح الارض والله ربنا يعلم صدق كلامي

وده مش عيب انى اساعد امي او يقلل من قدري كرجل

بالعكس والله ده يرفع قدرك جدا عند ربك لانك بتبر اهلك وبتعمل كده لله وابتغاء مرضاته عنك

انا مش عاوز اوضح كل حاجة بس ليه انا بقول الكلام ده

لان فيه رجالة وللاسف ناس ملتزمين منهم فاكرين ان المرأة دى ماهي الا خدامة فى البيت لزوجها

لا يااخى اتق الله

زوجتك هى نفسك استوصي بها خيرا ولاتكلفها مالا تطيق

مش عيب ابدا انك لما تشوفها تعبانة فى شغل البيت انك تساعدها

انت مش احسن من النبي عليه الصلاة والسلام كان يقوم بخدمة اهله وده اشرف الخلق

انت بقى متكبر انك تدخل مطبخ او تمسك مساحة وتمسح!!!!!!

يااخى ده النبي عليه الصلاة والسلام وصانا بالنساء وقالو استوصو بالنساء خير

هل تنفيذ الوصية انك تخالف الوصية؟

هل تنفيذها انك ترجع من الشغل مبوذ ومكشر فى وشها وتنكد عليها؟

لا يااخى من حسن معاشرتك لها انك ترفق بيها قال تعالى وعاشروهن بالمعروف

انا مش بتكلم عن الزوجة بس بتكلم عن النساء عامة

مينفعش تكون بره البيت شيخ وجوه البيت مع اهلك شيطان للاسف

خيركم خيركم لاهله

اخيرا نصيحة للاخوة ترفق بنساء بيتك وساعدهم وخليك دايما مبتسم

ونصيحة للاخوات لو ربنا رزقك برجل طيب ويعاملك بما يرضى الله اوعى تفتكري ده ضعف منه

او تستغليه فى كل حاجة مش تنامي اليوم كله وهو يرجع من شغله يلاقيكي نايمة ومفيش أكل !!!!

اتقوا الله فى انفسكم

وفى النهاية أسأل الله ان يصلح احوالنا واحوال المسلمين

» حبل غسيل ::أرواح البشر::!!
» قصر تحت الارض بناه نمل ؟؟! سبحان الله
» المسيح الدجال ( اعظم فتنة سوف تمر على وجه الارض )
» المصريه للاتصالات تطلق عرض جديد علي النليفون الارض
» قصة الترم الثانى - بوربوينت راااااااااائع - رحلة الى مركز الارض