موقف من الواقع ووالله هذا الكلام حدث

هحكي لكم موقف من الواقع ووالله هذا الكلام حدث ..
.
.
.
.
....
.
.

أنا أعرف واحد كان بيحب واحده لدرجة الجنون .. هم الاتنين كده .. المنطقه كلها كانت بتتكلم عنهم ..
عاشوا قصة حب حوالي سنة ونصف بس ارتبطوا ببعض ارتباط وثيق جدا جدا جدا ..
لدرجة إن الولد ساب بيت أهله عشانها .. وجاله الضغط عشانها .. ونام في السرير مش قادر يتحرك عشانها ..
وهي .. انضربت من أبوها ودراعها اتعور واتخيط .. ووقعها من عالسلم وضهرها حصل فيه زي شرخ أو شيء في الفقرات ..

ده كله عشان ميسيبوش بعض !!

طبعا كل اللي كان يعرفهم كان بيقول عمر قصتهم ما هتنتهي بالفراق ..
دول عمرهم ما يسيبوا بعض ولو عرضوهم للموت ..

حبايبنا
دول .. قاسوا وعانوا واتبهدلوا في سبيل أن يسطر التاريخ قصة روميو وجولييت
جديدة .. ولكن هيهات هيهات .. مضى عهد الجاهلية وفااااااات ..

أنا حبيت أوصف لكم بعض من حياة اتنين حبوا بعض حب صادق ..
وطلبوا ارتباط من الاهل لكن الولد كان طالب أدامه 4 سنين في الكلية والبنت عرسانها كتير !!!!!

بالفعل البنت اتخطبت غصبا لقريبها .. ولكن قصة الحب بينها وبين أخونا التاني مازالت مستمرة ..
لأنه وعدها عمره ما هيتخلى عنها مهما حصل .. وكان صادق معاها ..

لحد هنا القصة جميلة ورومانسية وتمام التمام ..

نيجي للحبكة ..

أخونا بدأ في فترة بعدهم وعدم قدرتهم على التواصل رحلة البحث عن السعادة وعن قلبه الذي ضيعه الحب ..

بدأ يعرف طريق المسجد والقرآن والصحبة الصالحة ..
بدأ قلبه يرجع له .. بس بيتعلق بحد تاني .. بدأ يتعلق بالقرآن ... سبحان مغير الأحوال ..
لا زال على علاقة بيها .. بس بدأ يتغير ..
حست إنه بيتغير .. بدأت تضعف ادام ضغط أهلها إنهم عاوزين يكتبوا الكتاب بتاعها ..
بدأ يقرب من ربنا أكتر .. وهي ينضغط عليها أكتر ..
هو مش عاوز يطلب الفراق عشان الوعد اللي وعدها بيه .. وهي كمان نفس الموضوع ..

لحد ما الراية البيضا اترفعت على أرضها ..... وكانت المفاجأه ..
طلبت منه يبعدوا عن بعض عشان مبقتش مستحمله ... وبالفعل تم ما أرادت ..

طبعا أنا مدخلتش في تفاصيل كتير .. لكن جبت المفيد من القصة ..

اللي عاوز الفت نظرنا ليه ..
هو
إن أخونا ده على الرغم من شدة حبه ليها وتعلقه بيها .. بدأ يحب القرآن ..
بدأ بجد يتغير .. حفظ ما يقرب من نصف القرآن .. بدأ يحفّظ أطفال صغار ..
وما زال على علاقته بيها !!

بدأ يقرب من القرآن اكتر .. ربنا وفقه وبعدوا عن بعض ..
لكن لازم ربنا يمتحنه !!

أخونا بعد عن أختنا .. وبدأ يتعمق مع القرآن ويتوغل ويقرب أكتر .. حب الالتزام .. أطلق لحيته

لكن القلب وما ادراك ما القلب .. هو السيد في الجسد .. أراد الله أن يختبره ..
أختنا بعتت له رسالة ... طبعا هو حافظ رقمها .. عرف إنها هي ..

نجح في الاختبار الأول ومردش عالرسالة ...
بدأت ترن عليه ..
وهنا عصرة قلب التائب ..
ربنا بيعصر قلبك عشان يختبر ثباتك أيها التائب وأيتها التائبه ..
هتثبت ولا هتنتكس تاني ..

يا ترى اخونا ثبت ولا انتكس ؟؟؟؟

بدأ قلبه يدق من تاني .. ويفكر في الماضي اللي لسه آثاره جواه منضفهاش ..
بدأ يسرح بخياله ويسترجع أيامه معاها ...
قرب من التليفون .. ياترى بيفكر في إيه .. هيعمل إيه ؟؟
استر يارب ..

أخونا الحمد لله كنسل ..
وقرر يبعد عن الماضي وينساه ..
ومضيعش حلاوة القرب من القرآن والأنس به اللي ربنا أهداها له في بداية طريقه عشان يقرب أكتر وأكتر ..

تكررت المحاولات لكن أخونا بفضل الله ثبت على الدرب .. ووفقه الله ..
وهدية ربنا له إنه عرفه طريقه أكتر ونزعها من قلبه ونزع كل واحده تانيه من قلبه .. ربنا يرزقنا حبه يارب .

إيه الفائده من القصة دي كلها ؟؟

الفايده إن دي قصة واقعيه يعني _ حدثت بالفعل ) .. مش وهميه ..
بواجه بيها الشباب والبنات بقولهم ده نموذج بفضل الله دلوقتي أصبح أخ وقرب من ربنا .. نسأل الله له الثبات ..
بينصح الشباب دلوقتي يبعدوا عن الطريق ده لأنه كله ألغام وأخطار ..

بيوجه رساله ليكم وبيقولكم ..
والله الأمر مش بالصعوبه الي انتوا متخيلينها ..
حاولوا تهربوا من الماضي وتواجهوه بسلاح القرب من الله ..

هقول لكم هو واجه نفسه بإيه عشان يقدر ينجح بفضل الله في اختبار ربنا له ..
سأل نفسه وقال ... مين اللي خلقني ؟
طيب هو أمرني بإني أعمل اللي كنت بعمله ؟
طيب أنا لو رجعت للطريق تاني مصيري يوم الحساب إيه؟
طيب أنا كده مش بخون ربنا عشان حملني أمانة ( قلبي ) وأنا علقته بغيره ؟
طيب أنا كده مش بخون أهلي اللي ادوني الثقة وكان نفسهم أرفع راسهم أدام الناس كلها .. خذلتهم وخليت سيرتهم على كل لسان ؟
طيب أنا كده بخون زوجتي اللي ربنا كاتبهالي إن شاء الله ولا لاء؟؟

صديق آخر بيحكي وبيقول ..
أنا ربنا ابتلاني بعد ما تبت من الذنب ده .. ابتلاني في أختي
حبت شاب عن طريق التليفون ...
عاشت فترة كبيره معااه عالتليفون .. وفشلت القصة ..
حبت أخوا واحده صاحبتها .. والأمور اتطورت .. واتكلموا في التليفونات .. والأمور اتطورت ..
الحمد
لله ربنا هداها هي كمان وحاليا أخت منتقبة نسأل الله لنا ولها الثبات ..
لكن الجملة اللي وقعت منه كالصاعقة عليا وهو بيقول لي ..
امبارح وأنا رايح المسجد قابلت في الطريق الولد اللي كان بيحب اختي ..
هو ميعرفش إن أنا عرفت ..
لكن لما نظرت له وجدت حياء وخجل جوايا من اللي أختي عملته شديد أوي آذاني ..
وقولت ده عقابك من ربنا ..
زي ما كان أبو البنت اللي كنت ماشي معاها وكنت بجد بتحبها وصادق في حبك ليها ..
زي ما كانوا بينظروا لك نظرة بيشعروك بالعار اللي هم فيه ..
وعاوزين ينتقموا منك ..
أديك جربت النظرة دي وشوفت بعينك عار أختك أدامك ..

مين يحب يبقى في الوضع ده ؟؟؟
ربنا يقبل توبتك وتوبتها ...

هو ده الواقع يا احباب ...
قصص الحب الرومانسيه بتاعت زعتر وهبله .. وتيس وليلى ..
أوهام ... وخرافات وأساطير ..
وعصر جاهلي ..

يا شباب .. يا بنات ..
يا اللي جربتوا الحب ده .. إيه النتيجة ؟؟
يا اللي لسه بتدوروا عليه اتعلموا من غيركم ..
يا اللي افترقتم عن بعض ولسه بتشتكوا إن قلوبكم متعلقه ببعض .. مش كفايه وهم بقى ..
كفاية ضياع للعمر ..
كفاية ضياع للعفة والكرامة ..
كفاية ضياع لسمعتكم ..
كفاية بالله عليكم ..

العمليه سهله مش صعبه .. والواقع اللي قال كده مش الخيال ..

استعينوا بالله واصبروا ..

لازم عصرة للقلب ربنا بيختبر ثباتكم ..

ها هنحاول ونجاهد عشان ربنا يسامحنا ويسترها مع أخواتنا وأمهاتنا وبناتنا ولا لاء؟؟

اللهم يا مقلب القلوب ثبت قلوبنا على دينك ..

أحبكم في الله .. ومتحرموناش من جميل تعليقاتكم ومناقشاتكم ..

السلام عليكم ورحمة الله وبركاته .

» موقف الدعاة من كثرة انتشار الباطل إن هداية الناس ثمرة لانتشار العلم الشرعي بين الناس ولكن من الملاحظ أن الباطل أكثر انتشارا عبر الصحافة وكافة وسائل الإعلام ومناهج التدريس . فما موقف الدعاة والعلماء من هذا؟
» استطلاع رأى : هل حقق مجلس الشعب انجازات على ارض الواقع حتى الان ؟!!!
» زبدة الكلام في شرح كتاب الصيام
» امتحان اللغة الانجليزية 2012 للصف الثانى الثانوى بين الواقع والمتوقع :: هام ::
» موقف الإسلام من العلمانية